காவல்துறையைப் பொறுத்தவரை சட்டம்-ஒழுங்கை பாதுகாப்பது, போதைப்பொருள் தடுப்பு உள்ளிட்ட பல்வேறு நடவடிக்கைகள் மேற்கொள்ளப்பட்டு வருவதாகவும், இதுதொடர்பான அறிவிப்புகள் நேற்றும் வெளியிடப்பட்டதாகவும் அவர் கூறினார்.
சட்டப்பேரவை குறித்து பல்வேறு தரப்பினரும் கருத்துகளை தெரிவித்து வருவதாகக் குறிப்பிட்ட செங்கோட்டையன், கடந்த காலங்களில் ஆட்சியில் இருந்தவர்கள் சட்டப்பேரவைக்கான புதிய கட்டடங்களை அமைக்க முயற்சித்துள்ளதாக தெரிவித்தார். முன்னாள் முதல்வர் ஜெயலலிதாவும் ராணி மேரி கல்லூரியில் சட்டப்பேரவையை அமைக்க முயற்சி மேற்கொண்டதாக அவர் கூறினார்.
110-வது விதியின் கீழ் அறிவிப்புகளை வெளியிடுவது என்பது துறையின் தேவைகள் மற்றும் மானியக் கோரிக்கைகளுக்கு ஏற்ப முதலமைச்சர் மேற்கொள்ளும் நடவடிக்கை என்றும், இதனை அனைத்து முதலமைச்சர்களும் பின்பற்றி வந்துள்ளதாகவும் செங்கோட்டையன் தெரிவித்தார்.
மந்தை புறம்போக்கு, நீர்வழி புறம்போக்கு, மேய்ச்சல் புறம்போக்கு உள்ளிட்ட நீதிமன்றத் தீர்ப்புகளின்படி பட்டா வழங்கக் கூடாத நிலங்கள் குறித்து ஆய்வு செய்து, சட்டரீதியான நடவடிக்கை எடுக்கப்படும் என அவர் தெரிவித்தார்.
ஆலயங்கள் தொடர்பான புறம்போக்கு நிலங்களுக்கும் இதே நடைமுறை பொருந்தும் என்றும், சம்பந்தப்பட்ட துறைகள் மூலம் ஆய்வு மேற்கொண்டு நடவடிக்கை எடுக்கப்படும் என்றும் கூறினார்.
அனைத்து கேள்விகளுக்கும் முதலமைச்சரே பதிலளிக்க வேண்டிய அவசியம் இல்லை என்றும் செங்கோட்டையன் தெரிவித்தார். கடந்த ஆட்சியின்போதும் முதலமைச்சர் மு.க.ஸ்டாலின் இருந்த நிலையில், அமைச்சர் ரகுபதி உள்ளிட்ட பலர் சட்டப்பேரவையில் எழுப்பப்பட்ட கேள்விகளுக்கு பதிலளித்ததாக அவர் குறிப்பிட்டார்.
தமிழக வெற்றி கழகம் குறுகிய காலத்திலேயே தமிழக அரசியல் களத்தில் முக்கிய இடத்தைப் பிடித்துள்ளதாக செங்கோட்டையன் தெரிவித்தார். தமிழக மக்கள் அந்தக் கட்சியை நம்பி வாக்களித்துள்ளதாகவும் அவர் கூறினார்.
அக்கட்சி குறுகிய காலத்தில் அரசியல் களத்தில் குறிப்பிடத்தக்க இடத்தைப் பிடித்துள்ளதாகக் கூறிய அவர், “விஜய்யை இந்திய பிரதமர் வேட்பாளராக முன்னிறுத்த முடியுமா?” என்ற செய்தியாளர்களின் கேள்விக்கு, “என்னை சிக்கலில் மாட்டிவிடும் வகையில் இதுபோன்ற கேள்விகளைக் கேட்காதீர்கள்” என நகைச்சுவையாக பதிலளித்தார்.
Leave a Reply