கோவை காந்திபுரம் பகுதியில் உள்ள செம்மொழிப் பூங்காவில் தமிழ்நாடு பிற்படுத்தப்பட்டோர் நலத்துறை அமைச்சர் சம்பத் குமார் இன்று நேரில் ஆய்வு மேற்கொண்டார். பூங்காவை சுற்றிப் பார்வையிட்ட அவர், பொதுமக்களுக்கான அடிப்படை வசதிகள் குறித்து அதிகாரிகளிடம் கேட்டறிந்தார்.
கோவையின் முக்கிய பொழுதுபோக்கு இடங்களில் ஒன்றாக செம்மொழிப் பூங்கா விளங்கி வருகிறது. இங்கு தினமும் குடும்பத்துடன் ஏராளமான பொதுமக்கள் வந்து செல்கின்றனர். குறிப்பாக வார விடுமுறை மற்றும் விசேஷ நாள்களில் மக்கள் கூட்டம் அதிகளவில் காணப்படுகிறது.
பூங்காவில் பல்வேறு வகையான செடி, கொடி மற்றும் பூச்செடிகள், தமிழர் பாரம்பரியத்தைப் பறைசாற்றும் கற்சிலைகள், செயற்கை நீரூற்று உள்ளிட்டவை அமைக்கப்பட்டுள்ளன. மேலும், குழந்தைகளுக்கான விளையாட்டுப் பகுதியும், பொதுமக்கள் பயன்படுத்தும் நடைபாதை மற்றும் உடற்பயிற்சி கூடமும் உள்ளன.
இந்நிலையில், செம்மொழிப் பூங்காவுக்கு இன்று சென்ற அமைச்சர் சம்பத் குமார், அங்குள்ள குடிநீர் வசதி, நடைபாதை உள்ளிட்ட அடிப்படை வசதிகளை ஆய்வு செய்தார். பூங்காவுக்குத் தேவையான கூடுதல் வசதிகள் மற்றும் பராமரிப்பு பணிகள் குறித்து அங்கிருந்த அலுவலர்களிடம் கேட்டறிந்தார்.
தொடர்ந்து, பூங்காவில் அமைக்கப்பட்டுள்ள உடற்பயிற்சி கூடத்திற்குச் சென்ற அமைச்சர் சம்பத் குமார், அங்கு உடற்பயிற்சியும் மேற்கொண்டார்.
Leave a Reply