கோவை மாவட்ட ஆட்சியர் அலுவலகம் அருகே நேற்று இரவு நடைபெற்ற கத்திக்குத்து சம்பவம் அப்பகுதியில் பெரும் பரபரப்பை ஏற்படுத்தியது. பாதுகாப்பு முக்கியத்துவம் வாய்ந்த அரசு அலுவலகம் அருகே இந்த தாக்குதல் நடைபெற்றதால் பொதுமக்கள் அதிர்ச்சியடைந்தனர்.
கோவை மாவட்ட ஆட்சியர் அலுவலகம் அருகே உள்ள இட்லி கடையில் பொதுமக்கள் வழக்கம்போல் உணவருந்திக் கொண்டிருந்தனர். அப்போது மது போதையில் வந்த சில இளைஞர்கள் அங்கிருந்தவர்களுடன் வாக்குவாதத்தில் ஈடுபட்டதாக கூறப்படுகிறது. இந்த தகராறு சில நிமிடங்களில் மோதலாக மாறியது.
அப்போது விஷ்வேஷ் என்ற இளைஞர் மீது கத்தியால் சரமாரியாக தாக்குதல் நடத்தப்பட்டதாக தெரிவிக்கப்படுகிறது. இதில் அவரது வலது கை மற்றும் வலது காலில் பலத்த காயம் ஏற்பட்டது. சம்பவ இடத்தில் இருந்தவர்கள் உடனடியாக அவரை மீட்டு ஆம்புலன்ஸ் மூலம் கோவை அரசு மருத்துவமனைக்கு அனுப்பி வைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.
தாக்குதல் நடத்தியவர்கள் சம்பவ இடத்திலிருந்து தப்பியோடிய நிலையில், தகவல் அறிந்த காவல் துறையினர் தீவிர தேடுதல் வேட்டையில் ஈடுபட்டனர். இதையடுத்து கோவை ரயில் நிலையம் அருகே பதுங்கியிருந்த தஞ்சாவூர் மாவட்டத்தைச் சேர்ந்த 4 பேரை காவல் துறையினர் கைது செய்தனர்.
கைது செய்யப்பட்டவர்களிடம் தொடர்ந்து விசாரணை நடத்தப்பட்டு வருகிறது. முன்விரோதம் காரணமாக தாக்குதல் நடைபெற்றதா அல்லது மது போதையில் ஏற்பட்ட தகராறா என்பது உள்ளிட்ட பல்வேறு கோணங்களில் காவல் துறையினர் விசாரணை மேற்கொண்டு வருகின்றனர்.
மக்கள் அதிகம் கூடும் மற்றும் பாதுகாப்பு முக்கியத்துவம் வாய்ந்த பகுதியில் இப்படியான வன்முறை சம்பவம் நடைபெற்றுள்ளது பொதுமக்களிடையே அச்சத்தை ஏற்படுத்தியுள்ளது.
Leave a Reply