கலோரி எரிப்பில் நீச்சல் முன்னிலை: 30 நிமிடங்கள் வேகமாக நடப்பதன் மூலம் சராசரியாக சுமார் 150 கலோரிகள் எரிக்கப்படலாம். அதே நேரத்தில், நீச்சலின் வேகம் மற்றும் தீவிரத்தைப் பொறுத்து 200-க்கும் மேற்பட்ட கலோரிகளை எரிக்க முடியும். எனவே, உடல் எடையைக் குறைக்க அல்லது கட்டுப்படுத்த விரும்புபவர்களுக்கு நீச்சல் கூடுதல் பலனை வழங்கக்கூடும்.
தசை வலிமையில் நீச்சல்: நடைப்பயிற்சி பெரும்பாலும் கால்கள் மற்றும் கீழ் உடல் தசைகளுக்கு சிறந்த பயிற்சியாக அமைகிறது. குறிப்பாக வேகமாக அல்லது சாய்வான பாதையில் நடப்பது தசைகளுக்கு கூடுதல் பயிற்சியை அளிக்கிறது. ஆனால் நீச்சலில் தண்ணீரின் எதிர்ப்புக்கு எதிராக உடலை இயக்குவதால் கைகள், கால்கள், தோள்கள், முதுகு மற்றும் உடலின் மையப் பகுதி என பல தசைக் குழுக்கள் ஒரே நேரத்தில் செயல்படுகின்றன.
இதய ஆரோக்கியம்: நடைப்பயிற்சியும் நீச்சலும் இதயத் துடிப்பை அதிகரித்து, ரத்த ஓட்டத்தை மேம்படுத்த உதவுகின்றன. வேகமான நடை இதய சகிப்புத்தன்மையை வளர்க்கும் நிலையில், நீச்சல் ஒரே நேரத்தில் பல தசைகளை ஈடுபடுத்துவதால் தீவிரமான இதய-நுரையீரல் பயிற்சியாக அமையக்கூடும்.
மூட்டுகளுக்கு ஏற்றது எது? நடைப்பயிற்சியுடன் ஒப்பிடும்போது நீச்சல் மூட்டுகளில் குறைவான அழுத்தத்தை ஏற்படுத்துகிறது. தண்ணீர் உடலின் எடையைத் தாங்குவதால், மூட்டுகளில் ஏற்படும் தாக்கம் குறைகிறது. இதனால் மூட்டுகளில் அதிக அழுத்தம் இல்லாமல் உடற்பயிற்சி செய்ய விரும்புபவர்களுக்கு நீச்சல் சிறந்த தேர்வாக இருக்கலாம்.
மனநலத்திலும் இரண்டுக்கும் பலன்: நடைப்பயிற்சியும் நீச்சலும் மன அழுத்தம் மற்றும் பதற்றத்தைக் குறைக்கவும், மனநிலையை மேம்படுத்தவும் உதவுகின்றன. வெளிப்புற சூழலில் நடைப்பயிற்சி மேற்கொள்வது மனதுக்கு புத்துணர்ச்சி அளிக்கக்கூடும்; நீச்சல் உடல் முழுவதையும் தொடர்ந்து இயக்குவதால் மனதை ஒருமுகப்படுத்த உதவும்.
எது சிறந்தது? எளிமையாகவும், எந்த இடத்திலும் மேற்கொள்ளக்கூடிய உடற்பயிற்சி தேவைப்படுபவர்களுக்கு நடைப்பயிற்சி ஏற்றது. அதேவேளையில், அதிக கலோரி எரிப்பு, முழு உடல் தசைப் பயிற்சி மற்றும் மூட்டுகளில் குறைந்த தாக்கம் ஆகியவற்றை எதிர்பார்ப்பவர்களுக்கு நீச்சல் கூடுதல் பலன்களை வழங்கக்கூடும். இருப்பினும், தனிநபரின் உடல்நிலை மற்றும் உடற்பயிற்சி இலக்குக்கு ஏற்ப தேர்வு செய்வதே சிறந்தது.
Leave a Reply