என்.டி.ஏ. வேட்பாளர்களுக்கு ஆதரவாக ஆந்திர முதல்வர் நாரா சந்திரபாபு நாயுடு தீவிர பிரசாரம்

ஆந்திரப் பிரதேச முதல்வர் நாரா சந்திரபாபு நாயுடு, தமிழ்நாடு சட்டமன்றத் தேர்தலை முன்னிட்டு என்.டி.ஏ. கூட்டணி வேட்பாளர்களுக்கு ஆதரவாக கோவையில் தீவிர தேர்தல் பிரசாரத்தில் ஈடுபட்டார்.
கோவையில் நடைபெற்ற இந்த நிகழ்ச்சியில் தொழிலதிபர்கள், பல்வேறு துறைகளின் நிபுணர்கள் மற்றும் கூட்டணி வேட்பாளர்களுடன் அவர் சந்தித்து, தற்போதைய அரசியல் சூழல், வளர்ச்சி வாய்ப்புகள் மற்றும் முதலீட்டு திட்டங்கள் குறித்து விரிவாக கலந்துரையாடினார்.
தொண்டாமுத்தூர் அதிமுக வேட்பாளர் எஸ்.பி.வேலுமணி, கோவை வடக்கு தொகுதி பாஜக வேட்பாளர் வானதி சீனிவாசன், தெற்கு தொகுதி அதிமுக வேட்பாளர் அம்மன் கே. அர்ச்சுணன், சிங்காநல்லூர் அதிமுக வேட்பாளர் கே.ஆர். ஜெயராம், கவுண்டம்பாளையம் அதிமுக வேட்பாளர் பி.ஆர்.ஜி.அருண்குமார் மற்றும் சூலூர் அதிமுக வேட்பாளர் கந்தசாமி, முன்னாள் பாஜக மாவட்ட தலைவர் பாலாஜி உத்தமராமசாமி உள்ளிட்டோர் கூட்டத்தில் பங்கேற்றனர்.
மக்களிடம் உரையாற்றிய நாயுடு, “என்.டி.ஏ. வேட்பாளர்களுக்கு வாக்களித்து வெற்றி பெறச் செய்ய வேண்டும். தமிழ்நாடு மற்றும் ஆந்திரப் பிரதேசம் இடையேயான வரலாற்று மற்றும் பண்பாட்டு உறவுகள் வலுவாக உள்ளன,” என்று தெரிவித்தார்.
நீர்வள மேலாண்மை குறித்து பேசிய அவர், முன்னாள் முதல்வர் என்.டி. ராமா ராவ் ஆட்சிக்காலத்தில் தெலுங்கு கங்கை திட்டம் மூலம் சென்னை நகருக்கு குடிநீர் வழங்கப்பட்டதை நினைவுகூர்ந்தார். நதிகள் இணைக்கப்பட்டால் கோதாவரி நீரை தமிழ்நாட்டிற்கு வழங்கும் வாய்ப்பு உருவாகும் என்றும் கூறினார்.
பிரதமர் நரேந்திர மோடி நதிகள் இணைப்பு திட்டத்திற்காக முயற்சி செய்து வருவதாகவும், இது நாட்டின் நீர் பாதுகாப்புக்கு மிகப்பெரிய ஆதாரமாக அமையும் என்றும் அவர் தெரிவித்தார்.
பெண்களுக்கு 33 சதவீத ஒதுக்கீடு வழங்கும் மசோதா மற்றும் தொகுதி மறுசீரமைப்பு மசோதாவை சில கட்சிகள் எதிர்த்தது தவறு என்றும் அவர் விமர்சித்தார். பெண்களின் முன்னேற்றத்திற்காக இந்த ஒதுக்கீடு மிகவும் அவசியம் என்றும் வலியுறுத்தினார்.
மேலும், ஆந்திரப் பிரதேசத்தில் “இரட்டை இயந்திர அரசு” காரணமாக வேகமான வளர்ச்சி ஏற்பட்டுள்ளதாகவும், பெருமளவில் முதலீடுகள் வந்துள்ளதாகவும் அவர் குறிப்பிட்டார். கூகுள் நிறுவனம் 15 பில்லியன் டாலர் முதலீடு செய்திருப்பதாகவும், குவாண்டம் கணினி தொழில்நுட்ப பள்ளத்தாக்கு அமைக்கும் திட்டமும் முன்னெடுக்க ப்படுவதாகவும் தெரிவித்தார்.
தமிழ்நாட்டின் தொன்மை, பண்பாடு மற்றும் ஆன்மிக பாரம்பரியத்தைப் பாராட்டிய அவர், “இது தொன்மையான நாகரிக மண். சுப்பிரமணிய பாரதி, கண்ணகி, திருவள்ளுவர், சி.வி. ராமன் போன்ற பெருமைமிகு ஆளுமைகள் இந்த மண்ணில் பிறந்தவர்கள்,” என்றார்.
இறுதியாக, “என்.டி.ஏ. கூட்டணி வெற்றி பெற்றால் வளர்ச்சி மற்றும் முன்னேற்றம் உறுதி. இரட்டை இயந்திர அரசு அமைந்தால் அதன் பலனை மக்கள் நேரில் காண்பார்கள்,” என்று கூறி மக்களிடம் ஆதரவு கோரினார்.