“எனக்கு மட்டும் கட்சியில் பதவி வழங்குவதால் பயனில்லை; என்னை நம்பி வந்தவர்களுக்கும் உரிய பொறுப்புகள் வழங்கப்பட வேண்டும்” என்று முன்னாள் அமைச்சர் எஸ்.பி.வேலுமணி ஆவேசமாக பேசியதாகக் கூறப்படும் வீடியோ சமூக வலைதளங்களில் வைரலாகி வருகிறது.
தமிழக அரசியலில் ஏற்பட்டுள்ள மாற்றங்களின் பின்னணியில், அதிமுகவில் பல்வேறு நிர்வாக மாற்றங்கள் நடைபெற்று வருகின்றன. அக்கட்சியின் முன்னாள் அமைச்சர் எஸ்.பி.வேலுமணி வகித்து வந்த தெற்கு மாவட்டச் செயலாளர் பதவி முன்னதாக அவரிடமிருந்து மாற்றப்பட்டு, முன்னாள் மேயர் செ.ம.வேலுசாமிக்கு வழங்கப்பட்டது.
இதையடுத்து, அதிமுக பொதுச்செயலாளர் எடப்பாடி கே. பழனிசாமி மற்றும் எஸ்.பி.வேலுமணி இடையே சமரசம் ஏற்பட்டதாகக் கூறப்பட்ட நிலையில், அவர் கட்சியின் துணைப் பொதுச்செயலாளராக நியமிக்கப்பட்டார். இருப்பினும், அவர் முன்பு வகித்த புறநகர் தெற்கு மாவட்டச் செயலாளர் பதவி மீண்டும் வழங்கப்படவில்லை.
இந்த நிலையில், தொண்டாமுத்தூர் பகுதியில் நடைபெற்ற ஆலோசனைக் கூட்டத்தில் தனது ஆதரவாளர்களைச் சந்தித்த எஸ்.பி.வேலுமணி, தேர்தலில் தனக்கு ஆதரவாக செயல்பட்ட நிர்வாகிகள் மற்றும் தொண்டர்களுக்கு நன்றி தெரிவித்தார்.
அப்போது பேசியதாக வெளியாகியுள்ள வீடியோவில், “எனக்கு மட்டும் பதவி கொடுப்பதால் என்ன பயன்? என்னை நம்பி வந்தவர்களுக்கும் பொறுப்புகள் வழங்கப்பட வேண்டும். முன்னாள் அமைச்சர்கள் தங்கமணி, சி.வி.சண்முகம், சி.விஜயபாஸ்கர் உள்ளிட்டோர் கட்சிக்காக பல ஆண்டுகளாக உழைத்து, தங்கள் மாவட்டங்களில் செலவிட்டு கட்சியை வளர்த்தவர்கள்” என்று அவர் பேசியதாகக் கூறப்படுகிறது.
இந்த வீடியோ தற்போது சமூக வலைதளங்களில் பரவலாக பகிரப்பட்டு, அரசியல் வட்டாரங்களில் பரபரப்பை ஏற்படுத்தியுள்ளது. அதேவேளையில், இந்த விவகாரம் குறித்து அதிமுக தலைமையிலிருந்து இதுவரை அதிகாரப்பூர்வ விளக்கம் எதுவும் வெளியாகவில்லை.
Leave a Reply