இல்லத்தரசிகளுக்கு தீபாவளிப் பரிசு! ‘வெற்றி சிறப்பு காய்கறித் தொகுப்பு’: தமிழ்நாடு அரசு அரசாணை வெளியீடு!

தீபாவளிப் பண்டிகையை முன்னிட்டு, இல்லத்தரசிகளின் சிரமத்தைக் குறைக்கும் வகையில் தமிழ்நாடு அரசு சார்பில் மிகக் குறைந்த விலையில் அத்தியாவசியக் காய்கறிகள் அடங்கிய ‘வெற்றி சிறப்பு காய்கறித் தொகுப்பு’ வழங்கப்படும் என அறிவிக்கப்பட்டுள்ளது. இதற்கான அதிகாரப்பூர்வ அரசாணையைக் கூட்டுறவுத்துறை வெளியிட்டுள்ளது.

வரும் நவம்பர் 5-ஆம் தேதி முதல் 7-ஆம் தேதி வரை (நவ. 5 – 7) தேர்ந்தெடுக்கப்பட்ட 218 கூட்டுறவு விற்பனை நிலையங்கள் மற்றும் சென்னையில் இயக்கப்பட உள்ள 4 நடமாடும் காய்கறி அங்காடிகள் மூலம் இந்தச் சிறப்பு விற்பனை நடைபெற உள்ளது.

காய்கறித் தொகுப்பில் இடம்பெற்றுள்ள பொருட்கள்:

• பெரிய வெங்காயம் – 500 கிராம்

• தக்காளி – 500 கிராம்

• உருளைக்கிழங்கு – 250 கிராம்

• கத்தரிக்காய் – 250 கிராம்

• கேரட் – 200 கிராம்

• பீன்ஸ் – 200 கிராம்

• பச்சை மிளகாய் – 100 கிராம்

• எலுமிச்சை – 100 கிராம்

• இஞ்சி – 50 கிராம்

• தேங்காய் – 1 (400 – 450 கிராம்)

பண்டிகைக் காலத்தில் காய்கறிகளின் விலை உயர்வைத் தடுத்து, ஏழை மற்றும் நடுத்தர மக்களுக்குப் பலனளிக்கும் வகையில் இந்தத் திட்டம் தொடங்கப்பட்டுள்ளதாகத் தெரிவிக்கப்பட்டுள்ளது.