“ஊராட்சி ஒன்றிய ஒப்பந்ததாரர்களின் கோரிக்கைகள் நிறைவேற்றப்படுமா?” – கோவை மாவட்ட நலச்சங்க கலந்தாய்வுக் கூட்டத்தில் நிர்வாகி நாராயணசாமி பேட்டி.

கோவை மாவட்டத்தில் உள்ள 12 ஊராட்சி ஒன்றியங்களைச் சேர்ந்த ஒப்பந்ததாரர்கள் ஒருங்கிணைந்து, “கோவை மாவட்ட அனைத்து ஊராட்சி ஒன்றிய ஒப்பந்ததாரர்கள் நலச்சங்கம்” என்ற அமைப்பின் கலந்தாய்வுக் கூட்டத்தை நடத்தினர். இக்கூட்டத்தின் நிறைவில், சங்கத்தின் நிர்வாகி நாராயணசாமி செய்தியாளர்களைச் சந்தித்துப் பேசினார்.

செய்தியாளர்களிடம் பேசிய சங்க நிர்வாகி நாராயணசாமி, கிராமப்புற ஊராட்சி ஒன்றிய ஒப்பந்ததாரர்கள் சந்தித்து வரும் பல்வேறு சிரமங்கள் குறித்தும், அரசின் கவனத்திற்கு எடுத்துச் செல்ல வேண்டிய முக்கிய கோரிக்கைகள் குறித்தும் விரிவாகப் பேசினார்:

கோவை மாவட்டத்தில் உள்ள 12 ஊராட்சி ஒன்றிய ஒப்பந்ததாரர்கள் ஒன்றிணைந்து இச்சங்கக் கூட்டத்தை நடத்தியுள்ளோம். கடந்த 2008-ஆம் ஆண்டிலும் இதேபோன்று சங்கம் அமைத்துச் செயல்பட்டு வந்தோம்.

ஊரகப் பகுதிகளில் குறைந்த மதிப்பீட்டிலான ஒப்பந்தப் பணிகளையே எடுத்து, தரம் குறையாமல் அர்ப்பணிப்புடன் செய்து வருகிறோம். ஆனால், கட்டுமானப் பொருட்களின் கடும் விலை உயர்வுக்கு ஏற்பப் பொதுப்பணித்துறை வழங்கும் ஒப்பந்தப் புள்ளிகள் (Schedule of Rates) சீராக மாற்றப்படுவதில்லை. சந்தை நிலவரத்தை விட 20% குறைவான மதிப்பீட்டிலேயே பணிகள் ஒதுக்கப்படுகின்றன.

மேலும், ரூ. 10 லட்சத்திற்குக்கீழ் உள்ள பணிகளுக்கும் ஆன்லைன் டெண்டர் முறை கொண்டு வரப்பட்டதால், உள்ளூர் ஒப்பந்ததாரர்களின் வாழ்வாதாரம் கடுமையாகப் பாதிக்கப்பட்டுள்ளது. கடந்த 10 ஆண்டுகளுக்கு முன்பு வரை அரசு வழங்கி வந்த சிமெண்ட், கம்பி போன்ற கட்டுமானத் தளவாடப் பொருட்களை மீண்டும் ஊரக வளர்ச்சித்துறை மூலம் வழங்க நடவடிக்கை எடுக்க வேண்டும்.

பணிகள் முடிவடைந்த பின் ‘ஆடிட்’ தொகையை விடுவிப்பதில் ஏற்படும் தாமதத்தைத் தவிர்த்து, பிடித்து வைக்கப்படும் வைப்புத் தொகையை (EMD) விரைவாக வழங்க வேண்டும்.

இக்கூட்டமும் இதிலுள்ள கோரிக்கைகளும் எந்த அரசுக்கோ அல்லது அதிகாரிகளுக்கோ எதிரானவை அல்ல; ஒப்பந்ததாரர்களின் நியாயமான வாழ்வாதாரப் பிரச்சினைகளை அரசின் கவனத்திற்குக் கொண்டு செல்வதே எங்களது நோக்கம். ஊராட்சி ஒன்றிய ஒப்பந்ததாரர்களின் கோரிக்கைகளை அரசு கவனத்தில் கொண்டு, உரிய தீர்வு காண வேண்டும் என்பதே இச்சங்கத்தின் முதன்மையான எதிர்பார்ப்பாக உள்ளது.”