கோவையைச் சேர்ந்த சுற்றுச்சூழல் அமைப்பான சிறுதுளி (Siruthuli) நிர்வாகிகள், அதன் தலைவர் டாக்டர் எஸ்.வி. பாலசுப்ரமணியம் தலைமையில், தமிழ்நாடு முதலமைச்சர் சி. ஜோசப் விஜய்யை சந்தித்து, அமைப்பின் சுற்றுச்சூழல் பாதுகாப்பு பணிகள் மற்றும் அரசின் ஒத்துழைப்பு தேவைப்படும் முக்கிய அம்சங்கள் குறித்து ஆலோசனை நடத்தினர்.
இந்தச் சந்திப்பில் சிறுதுளி நிர்வாக அறங்காவலர் வனிதா மோகன், வழிகாட்டும் குழு உறுப்பினர் ஆர்.எஸ். கிருஷ்ணசாமி மற்றும் தலைமை செயல்பாட்டு அலுவலர் சி. சின்னசாமி ஆகியோர் பங்கேற்றனர்.
சந்திப்பின் போது, நீர்நிலைகள் சீரமைப்பு, மரக்கன்றுகள் நடுதல், திடக்கழிவு மேலாண்மை, சுற்றுச்சூழல் விழிப்புணர்வு நிகழ்ச்சிகள் உள்ளிட்ட சிறுதுளி அமைப்பின் பல்வேறு முன்னெடுப்புகள் குறித்து முதலமைச்சரிடம் விளக்கமளிக்கப்பட்டது. மேலும், தமிழகம் முழுவதும் சுற்றுச்சூழல் பாதுகாப்பை வலுப்படுத்தி, நிலையான வளர்ச்சியை ஊக்குவிக்கும் அமைப்பின் நீண்டகால செயல் திட்டங்களும் எடுத்துரைக்கப்பட்டன.
சுற்றுச்சூழல் பாதுகாப்பு, இயற்கை வளங்கள் பாதுகாப்பு மற்றும் நிலையான வளர்ச்சி இலக்குகளை முன்னெடுத்து செல்லும் பணிகளில் அரசு மற்றும் சமூக அமைப்புகள் இணைந்து செயல்படுவதன் அவசியம் குறித்தும் இந்தச் சந்திப்பில் விரிவாக ஆலோசிக்கப்பட்டது.
மாநில அரசுடனும், பிற பங்குதாரர்களுடனும் இணைந்து, சுற்றுச்சூழல் பாதுகாப்புக்கான பயனுள்ள திட்டங்களை தொடர்ந்து செயல்படுத்தி, தூய்மையான, பசுமையான மற்றும் நிலையான தமிழ்நாட்டை உருவாக்க சிறுதுளி உறுதிபூண்டுள்ளதாக நிர்வாகிகள் தெரிவித்தனர்.
Leave a Reply