தமிழகத்தில் அண்மையில் நடைபெற்ற சட்டமன்றத் தேர்தலுக்கான வாக்கு எண்ணிக்கை வரும் மே 4ஆம் தேதி நடைபெறவுள்ள நிலையில், மாநிலம் முழுவதும் பாதுகாப்பு ஏற்பாடுகளை பலப்படுத்தும் நோக்கில் தமிழ்நாடு காவல்துறை தலைமை இயக்குநர் சந்தீப் ராய் ரத்தோர் முக்கிய உத்தரவு ஒன்றை பிறப்பித்துள்ளார்.
அதன்படி, மே 2ஆம் தேதி முதல் மறு உத்தரவு வரும் வரை காவல்துறையினர் யாரும் விடுப்பு எடுக்கக் கூடாது என அறிவிக்கப்பட்டுள்ளது. வாக்கு எண்ணிக்கை மற்றும் அதன் பின்னர் ஏற்படக்கூடிய சூழ்நிலைகளை கருத்தில் கொண்டு இந்த நடவடிக்கை எடுக்கப்பட்டுள்ளதாக கூறப்படுகிறது.
மேலும், தற்போது விடுப்பில் உள்ள காவலர்கள் மற்றும் அதிகாரிகளும் மே 2ஆம் தேதிக்குப் பிறகு தங்களது விடுப்பை நீட்டிக்க அனுமதி இல்லை என்றும் உத்தரவில் தெரிவிக்கப்பட்டுள்ளது.
எனினும், மகப்பேறு விடுப்பு, குழந்தை பராமரிப்பு விடுப்பு, கல்வி விடுப்பு மற்றும் முறையான காரணங்களுக்காக ஏற்கனவே வழங்கப்பட்ட மருத்துவ விடுப்பில் உள்ளவர்களுக்கு மட்டும் இந்த உத்தரவிலிருந்து விலக்கு அளிக்கப்பட்டுள்ளது.
இந்த அறிவுறுத்தல் களப் பிரிவுகள், சிறப்பு பிரிவுகள் மற்றும் அனைத்து நிலை காவல்துறை அதிகாரிகள் மற்றும் காவலர்களுக்கும் பொருந்தும் என தெரிவிக்கப்பட்டுள்ளது. உயரதிகாரிகள் முதல் அடிப்படை காவலர்கள் வரை அனைவரும் இந்த உத்தரவை கண்டிப்பாக பின்பற்ற வேண்டும் என டிஜிபி வலியுறுத்தியுள்ளார்.
வாக்கு எண்ணிக்கை நாளில் மாநிலம் முழுவதும் பலத்த பாதுகாப்பு ஏற்பாடுகள் செய்யப்பட உள்ள நிலையில், முடிவுகள் வெளியாகும் நேரத்தில் சட்டம் மற்றும் ஒழுங்கை பேணும் நோக்கில் இந்த உத்தரவு முக்கியத்துவம் பெற்றுள்ளது.
மே 4ஆம் தேதி மாலைக்குள் தேர்தல் முடிவுகள் வெளியாகும் என எதிர்பார்க்கப்படுவதால், தமிழகத்தின் அடுத்த ஆட்சியை அமைக்கும் கட்சி எது என்பது அன்றே தெளிவாகும்.
Leave a Reply