ராமனை வணங்குபவர்களின் ஓட்டு விசிகக்கு செல்லக்கூடாது – தமிழிசை சௌந்தர்ராஜன் பேட்டி

கோவை விமான நிலையத்தில் பாஜக மூத்த தலைவர் தமிழிசை சௌந்தர்ராஜன் செய்தியாளர்களை சந்தித்தார்.

அப்போது பேசிய அவர், கேரளாவில் நடைபெறவுள்ள உலக ஐயப்ப மாநாட்டில் முதல்வர் மு.க. ஸ்டாலின் கலந்து கொள்ள உள்ளதை கடுமையாக விமர்சித்தார். மேலும், விடுதலை சிறுத்தைகள் கட்சியினர் வன்னியரசு இந்து கடவுள் ராமர் குறித்து பேசியதையும் கண்டித்தார்.

தமிழிசை சௌந்தர்ராஜன் தொடர்ந்தும் கூறியதாவது:
“முதலமைச்சர் ஸ்டாலின், தமிழகத்தில் நடைபெறும் இந்துமத நிகழ்ச்சிகளில் பங்கேற்கவில்லை. ஆனால், கேரள முதல்வர் பினராயி விஜயன் அழைப்பின் பேரில் அங்கு நடைபெறும் ஐயப்ப மாநாட்டில் கலந்துகொள்கிறார். இது இந்துமத உணர்வுகளை புண்படுத்தும் செயல்.

வன்னியரசு ராமர் குறித்து பேசியது கடுமையாகக் கண்டிக்கத்தக்கது. கம்பராமாயணமும், ராமரும் சமூக நீதி மற்றும் சமத்துவத்தை போற்றுபவர்கள். சமதர்மத்தை நிலைநாட்டியவர் ராமர். ஆனால், திமுக ஆட்சியில் நடைபெறும் ஆணவக் கொலைகளை தடுக்காமல், அதற்கு ராமரையும் சனாதன தர்மத்தையும் காரணம் கூறுவது ஏற்றுக்கொள்ள முடியாது.

ஆணவக் கொலைகளை தடுக்கும் சிறப்பு சட்டம் பிற மாநிலங்களில் உள்ளது. ஆனால், தமிழகத்தில் மட்டும் இல்லை. அதற்காக போராட்டம் நடத்தாமல், மத நாயகர்களை குறை கூறுவது தவறு.”

அவர் மேலும் கூறுகையில்:
“இந்து மதத்தை பின்பற்றுபவர்கள் ராமனை வணங்குபவர்கள். அவர்களுடைய ஒரு வாக்கும் விசிகக்கு செல்லக்கூடாது. வன்னியரசுக்கு பாஜக சார்பில் கம்பராமாயணம் புத்தகங்களை வழங்க உள்ளோம்.

தமிழையும் தமிழர்களையும் போற்றுவது பாஜக தான். குடியரசுத் துணைத் தலைவர் வேட்பாளராக ஒரு தமிழரை அறிவித்தது பாஜக தான். ஆனால் திமுக உள்ளிட்ட இந்தி கூட்டணி கட்சியினர் அவருக்கு ஆதரவு அளிக்கவில்லை.

மம்தாவின் எதிர்ப்புக்காக ஒரு தமிழ் வேட்பாளரை தியாகம் செய்தனர். தமிழர்களின் பாதுகாவலர்கள் எனக் கூறுபவர்கள் இதற்கு பதில் கூற வேண்டும்” என தமிழிசை சௌந்தர்ராஜன் தெரிவித்தார்.