மதுரை மாவட்டம் திருப்பரங்குன்றம் அருள்மிகு சுப்பிரமணிய சுவாமி திருக்கோவிலில், குடமுழுக்கு விழா நடைபெற உள்ளதாக அறிவிக்கப்பட்டு, அதற்கான அனைத்து முன்னேற்பாடு பணிகளும் தீவிரமாக நடைபெற்று வருகின்றன.
குடமுழுக்கு விழாவை முன்னிட்டு, கோவிலில் கடைசி கட்ட ஆய்வுகளை தமிழக ஊரக வளர்ச்சி துறை அமைச்சர் இ. பெரிய மூர்த்தி, மதுரை மாவட்ட ஆட்சியர் எம். பிரவீன் குமார், காவல்துறை ஆணையாளர் லோகநாதன் உள்ளிட்டோர் நேரில் பார்வையிட்டு முன்னெச்சரிக்கை நடவடிக்கைகளை ஆய்வு செய்தனர்.
விழா நாளன்று பெருந்தொகையான பக்தர்கள் வருகை தர உள்ள நிலையில், கோவில் ராஜகோபுரத்திற்கு அருகே உள்ள மேல் தளத்தில் 1800 பேர் வரை அனுமதிக்கப்பட உள்ளனர். இதற்காக, மேல் தளத்திற்குச் செல்ல தற்காலிக படிக்கட்டுகள் அமைக்கப்படுவதுடன், பாதுகாப்புக்காக தடுப்பு வேலிகள் மற்றும் மேடைகள் அமைக்கும் பணிகளும் நடந்து வருகின்றன.
இவ்விழாவை சிறப்பாக காணமுடிய, கோவில் ராஜகோபுரம் மற்றும் அதன் பின்னால் உயர்ந்து விளங்கும் மலையின் மீது லேசர் ஒளி (மின்னொளி) அலங்காரம் செய்யப்பட்டுள்ளது. இவ்வகை ஒளி அலங்காரம், கோபுரம் மற்றும் மலை முழுவதும் ஒளிரும் அழகான தோற்றத்தை ஏற்படுத்தி, பக்தர்களின் பார்வையையும் பரவசத்தையும் கவரும் வகையில் அமைந்துள்ளது.
திருப்பரங்குன்றம் முருகன் கோவில், கார்த்திகை தீபம், சூரசம்ஹாரம், திருமண உற்சவம் போன்ற முக்கிய திருவிழாக்களுக்கு பெயர் பெற்றது. இப்போது நடைபெறவுள்ள குடமுழுக்கு விழாவும், பக்தர்கள் பெரும் ஆவலோடு எதிர்நோக்குகின்ற முக்கிய நிகழ்வாகும்.
மக்கள் கூட்டத்தை கட்டுப்படுத்தும் வகையில் காவல்துறை பலத்த பாதுகாப்பு ஏற்பாடுகளும் மேற்கொண்டுள்ளது. எனவே, பக்தர்கள் ஒழுங்காக கலந்து கொண்டு விழாவின் ஆனந்தத்தை பகிர்ந்துகொள்வதற்கான அனைத்து ஏற்பாடுகளும் நடைபெற்று வருகின்றன.
Leave a Reply