உலக மூட்டு தேய்மான தினத்தை முன்னிட்டு, கோயம்புத்தூர் ரேஸ்கோர்ஸ் பகுதியில் வி.ஜி.எம் மருத்துவமனை சார்பில் மூட்டு தேய்மானம் குறித்த விழிப்புணர்வு நடைப்பேரணி நடைபெற்றது. இப்பேரணியை கோவை மாவட்ட ஆட்சியர் பவன் குமார் ஜி. கிரியப்பனவர், ஐஏஎஸ்., கொடியசைத்துத் தொடங்கி வைத்தார்.
வி.ஜி.எம் மருத்துவமனையின் எலும்பியல் மற்றும் மூட்டு சிகிச்சைப் பிரிவுத் தலைவர் டாக்டர் சி.பி.எஸ். சுமன் தலைமையில் நடைபெற்ற இந்நிகழ்வில், மூட்டு தேய்மானத்தைத் தடுப்பது, முறையான உடற்பயிற்சி மற்றும் ஆரோக்கியமான வாழ்க்கை முறையின் அவசியம் குறித்து விழிப்புணர்வு ஏற்படுத்தப்பட்டது.
இளம் வயதினரையும் பாதிக்கும் மூட்டு தேய்மானம்!
நிகழ்ச்சியில் பேசிய டாக்டர் சி.பி.எஸ். சுமன், “முன்பெல்லாம் 60 முதல் 70 வயதுடையவர்களிடம் அதிகமாகக் காணப்பட்ட மூட்டு தேய்மானப் பிரச்சினை, தற்போது உடல் பருமன் மற்றும் வாழ்க்கை முறை மாற்றங்களால் 20 முதல் 30 வயதுடைய இளைஞர்களிடையேயும் அதிகரித்து வருகிறது” என்று தெரிவித்தார்.
குறிப்பாக, நீண்ட நேரம் ஒரே இடத்தில் அமர்ந்து பணியாற்றும் தகவல் தொழில்நுட்பத் துறையினர், ஆசிரியர்கள், வங்கி ஊழியர்கள் உள்ளிட்டோர் மூட்டுப் பிரச்சினைகளால் பாதிக்கப்படுவதாகக் குறிப்பிட்டார்.
மேலும், உடல் எடையைக் கட்டுக்குள் வைத்திருத்தல், வயதுக்கும் உடல்நிலைக்கும் ஏற்ற உடற்பயிற்சிகளை மேற்கொள்ளுதல், முறையான உணவுப் பழக்கங்களைப் பின்பற்றுதல் ஆகியவை மூட்டுகளின் ஆரோக்கியத்தைப் பாதுகாக்க உதவும் என்றும் வலியுறுத்தினார்.
மூட்டு தேய்மானம் உயிருக்கு நேரடியான ஆபத்தை ஏற்படுத்தாவிட்டாலும், அன்றாடச் செயல்பாடுகளைப் பாதித்து, வாழ்க்கைத் தரத்தைக் குறைக்கக்கூடும் என்றும் அவர் தெரிவித்தார்.
400-க்கும் மேற்பட்ட மாணவர்கள் பங்கேற்பு
இந்த விழிப்புணர்வு நடைப்பேரணியில் சேரன், ஜே.கே., எஸ்.என்.எஸ்., ரத்தினம், பி.பி.ஜி. உள்ளிட்ட ஆறு கல்லூரிகளைச் சேர்ந்த நர்சிங், பிசியோதெரபி மற்றும் ஆக்குபேஷனல் தெரபி மாணவர்கள் 400-க்கும் மேற்பட்டோர் பங்கேற்றனர்.
மாணவர்கள் வாயிலாகப் பொதுமக்களிடையே மூட்டுப் பாதுகாப்பு, முறையான உடற்பயிற்சி மற்றும் ஆரோக்கியமான உணவுப் பழக்கங்கள் குறித்த விழிப்புணர்வைப் பரவலாகக் கொண்டு சேர்ப்பதே இந்நிகழ்வின் முக்கிய நோக்கம் என மருத்துவமனை சார்பில் தெரிவிக்கப்பட்டது.
இளம் தலைமுறையினர் முதல் முதியவர்கள் வரை அனைத்து வயதினரிடமும் மூட்டு ஆரோக்கியம் குறித்த விழிப்புணர்வை ஏற்படுத்தும் வகையில் இந்த நடைப்பேரணி அமைந்தது.
Leave a Reply