தமிழ்நாடு காங்கிரஸ் கமிட்டிக்கு புதிய தலைவரை நியமிக்க கட்சியின் மேலிடம் முக்கிய ஆலோசனையில் ஈடுபட்டுள்ளதாக அரசியல் வட்டாரங்களில் தகவல்கள் வெளியாகியுள்ளன.
2026 சட்டமன்றத் தேர்தலுக்குப் பிறகு மாநிலத் தலைவர் பதவியை ராஜினாமா செய்ய இருப்பதாக தற்போதைய தலைவர் செல்வப்பெருந்தகை ஏற்கனவே அறிவித்திருந்த நிலையில், புதிய தலைவரை தேர்வு செய்யும் பணிகள் தீவிரமடைந்துள்ளன.
இந்த நிலையில், மாநிலத் தலைவர் பதவிக்கான போட்டியில் கார்த்தி சிதம்பரம், ஜோதிமணி, மாணிக்கம் தாகூர் ஆகியோரின் பெயர்கள் முன்னிலையில் பேசப்பட்டு வருகின்றன. அதேசமயம், மூத்த தலைவர்களான திருநாவுக்கரசர், கே.எஸ். அழகிரி மற்றும் தங்கபாலு ஆகியோரும் இந்த பதவிக்கான முயற்சியில் ஈடுபட்டு வருவதாக கூறப்படுகிறது.
கட்சியை அடுத்த கட்ட வளர்ச்சிப் பாதைக்கு கொண்டு செல்லக்கூடிய திறமையான மற்றும் அனைவரையும் ஒருங்கிணைக்கும் புதிய தலைமையை தேர்வு செய்ய வேண்டும் என்பதில் மேலிடம் அதிக முக்கியத்துவம் அளித்து வருவதாக தகவல்கள் தெரிவிக்கின்றன.
இதற்காக மாநிலத் தலைவர் பதவிக்கு தகுதியான ஐந்து பேர் கொண்ட பட்டியலை தயாரிக்க கட்சி மேலிடம் பொறுப்பாளர்களுக்கு உத்தரவிட்டுள்ளதாக கூறப்படுகிறது. இப்பட்டியலின் அடிப்படையில் இறுதி முடிவு எடுக்கப்பட உள்ளதாக தகவல்கள் வெளியாகியுள்ளன.
மேலும், புதிய தலைவரை தேர்வு செய்யும் பணிகளை மிகுந்த ரகசியத்துடன் மேற்கொள்ளுமாறு கட்சி மேலிடம் அறிவுறுத்தியுள்ளதாகவும், தேவையற்ற ஊகங்கள் மற்றும் உட்கட்சி பிரச்சினைகள் உருவாகாமல் இருக்க கவனமாக செயல்படப்படுவதாகவும் கூறப்படுகிறது.
வரவிருக்கும் அரசியல் சூழ்நிலையை கருத்தில் கொண்டு, மாநிலத்தில் கட்சியின் அமைப்பை வலுப்படுத்தும் வகையில் புதிய தலைவர் நியமனம் மிக முக்கியத்துவம் பெறும் என அரசியல் பார்வையாளர்கள் கருத்து தெரிவித்து வருகின்றனர்.
Leave a Reply