விழுப்புரம் மாவட்டம் பட்டானூரில் நடைபெற்ற பாட்டாளி மக்கள் கட்சியின் (பாமக) சிறப்புப் பொதுக்குழு கூட்டத்தில், கட்சியின் நிறுவனர் டாக்டர் ராமதாஸ் தலைமையில் முக்கிய தீர்மானங்கள் நிறைவேற்றப்பட்டன. கூட்டத்தில் ராமதாஸின் மகள் காந்திமதி, மாவட்ட செயலாளர்கள், முக்கிய தலைவர்கள் உள்ளிட்ட சுமார் 4,000 பேர் பங்கேற்றனர்.
பொதுக்குழுவில், ராமதாஸை மீண்டும் பாமக நிறுவனரும் தலைவராக தேர்வு செய்யும் தீர்மானம் நிறைவேற்றப்பட்டது. சட்டமன்றத் தேர்தலில் கூட்டணி அமைக்கும் அதிகாரமும் அவருக்கே வழங்கப்பட்டது. மேலும், பொதுக்குழுவுக்கு கட்சியின் நிறுவனர் கட்டாயம் அழைக்கப்பட வேண்டும் என்ற உரிமையும் உறுதி செய்யப்பட்டது.
மொத்தமாக 37 தீர்மானங்கள் நிறைவேற்றப்பட்டன. இதில் முக்கியமாக, அன்புமணிக்கு எதிராக 16 குற்றச்சாட்டுகள் பதிவு செய்யப்பட்டன. கட்சி ஒழுங்கு நடவடிக்கை குழுவின் அறிக்கையை ஜி.கே. மணி வாசித்தார். அதில்,
-
அன்புமணி கட்சிக்கு எதிராக செயல்படுகிறார்
-
ராமதாஸின் வீட்டில் ஒட்டுக்கேட்கும் கருவி வைத்தது
-
பொதுக்குழு என்ற பெயரில் தனிப்பட்ட கூட்டம் நடத்தி, நிறுவனருக்கு அவமானம் ஏற்படுத்தியது
என கடும் குற்றச்சாட்டுகள் கூறப்பட்டன.
இவை தவிர, பாமகவில் பிளவு ஏற்படுத்தும் விதத்தில் அன்புமணி செயல்பட்டதாகவும், அவர் மீது கட்சி ஒழுங்கு நடவடிக்கை எடுக்க ராமதாஸுக்கு பரிந்துரை செய்யப்பட்டது.
இந்நிலையில், பொதுக்குழுவில் உரையாற்றிய ராமதாஸ், “பாமக தொண்டர்களின் மனம் விரும்பும் கூட்டணி நிச்சயம் அமையும்” என உறுதிமொழி அளித்தார். இது, எதிர்காலத்தில் பாமக எந்தப் பக்கம் நகரும் என்பது குறித்து அரசியல் வட்டங்களில் புதிய விவாதங்களை கிளப்பியுள்ளது.
Leave a Reply