முதல் பரிசை வென்றது கோவை தமிழ்நாடு வேளாண்மைப் பல்கலைக்கழகம் (TNAU)

2023 ஆம் ஆண்டின் தேசிய நீர் விருதில் சிறந்த நிறுவனப் பிரிவில் (பள்ளி அல்லது கல்லூரி தவிர) முதல் பரிசை வென்றுள்ளது. இந்த விருது புதுமையான நீர் சேகரிப்பு பொறியியல் நடைமுறைகள், விவசாய நீர் மேலாண்மை தொழில்நுட்பங்கள் மற்றும் நீர் விழிப்புணர்வு பிரச்சாரங்களை ஏற்பாடு செய்ததற்காக வழங்கப்பட்டுள்ளது. புதுடில்லியில் நடைபெற்ற விழாவில் ஜனாதிபதி திரௌபதி முர்மு 5வது தேசிய நீர் விருதுகளை வழங்கினார். TNAU துணைவேந்தர் பேராசிரியர் V. கீதாலட்சுமி மற்றும் வேளாண் பொறியியல் துறையைச் சேர்ந்த டாக்டர் A. ரவிராஜ் ஆகியோர் இணைந்து விருதைப் பெற்றுக் கொண்டனர். விருதுடன் பாராட்டுப் பத்திரம், கோப்பை மற்றும் இரண்டு லட்சம் ரூபாய் ரொக்கப் பரிசும் வழங்கப்பட்டது.TNAU வளாகத்தில் மழைநீர் சேகரிப்புக்காக 2,300 கனமீட்டர் கொள்ளளவு கொண்ட 9 நிலத்தடி நீர் நிலைகள் உருவாக்கப்பட்டுள்ளன. இவை ஆய்வகங்கள், விவசாயம் மற்றும் தொடர்புடைய நடவடிக்கைகளுக்கான நீர் தேவையை பூர்த்தி செய்கின்றன. கிட்டத்தட்ட 100% மழைநீர் சேகரிக்கப்பட்டு திறம்பட பயன்படுத்தப்படுகிறது. மேலும், 400 கனமீட்டர் கொள்ளளவு கொண்ட பண்ணைக் குளத்தில் வடியும் நீரும் சேகரிக்கப்படுகிறது. வளாகத்தில் பெர்கோலேஷன் குளங்கள், ரீசார்ஜ் ஷாஃப்ட்கள், ரீசார்ஜ் பிட்கள் போன்றவை அமைக்கப்பட்டுள்ளன. இவை நிலத்தடி நீரை திறம்பட ரீசார்ஜ் செய்யப் பயன்படுகின்றன. ஆண்டுதோறும் சுமார் 4.4 மில்லியன் லிட்டர் மழைநீர் நிலத்தடி நீரில் ரீசார்ஜ் செய்யப்படுகிறது.பல்கலைக்கழக வளாகத்தில் சுமார் 12,500 மரங்கள் நடப்பட்டுள்ளன. மரக்கன்றுகளுக்கு நீர்ப்பாசனம் செய்ய சொட்டு நீர்ப்பாசனம், மழைக்குழாய் பாசனம் மற்றும் பானை நீர்ப்பாசனம் ஆகிய முறைகள் பயன்படுத்தப்படுகின்றன. மேலும், கழிவுநீர் சுத்திகரிப்பு நிலையம் (STP) அமைக்கப்பட்டு, சுத்திகரிக்கப்பட்ட நீரை தீவனப் பயிர்கள் மற்றும் வேளாண் மரங்களுக்கு பயன்படுத்துகின்றனர். TNAU நீர் மேலாண்மை தொடர்பான விழிப்புணர்வு நிகழ்ச்சிகள், களவிளக்கங்கள், கூட்டங்கள் ஆகியவற்றை தொடர்ந்து நடத்தி வருகிறது. மேலும், மழைநீர் சேகரிப்பு மற்றும் நிலத்தடி நீர் ரீசார்ஜ் தொடர்பான இரண்டு கொள்கை ஆவணங்களையும் வெளியிட்டுள்ளது. இத்தகைய முயற்சிகள் நீர் மேலாண்மையில் TNAU-வின் சிறப்பான பங்களிப்பை எடுத்துக்காட்டுகின்றன.