மீண்டும் கொரோனா பரவல்: மக்கள் முகக்கவசம் அணிய அறிவுறுத்தல்

இந்தியா முழுவதும் கொரோனா வைரஸ் தொற்று மீண்டும் அதிகரிக்கத் தொடங்கியுள்ளது. இதனையடுத்து, தமிழக சுகாதாரத்துறை பொதுமக்கள் கூட்டம் கூடும் இடங்களில் முகக்கவசம் அணிய அறிவுறுத்தியுள்ளது. கொரோனா தொற்றுடன் சேர்ந்து, சுவாச நோய்கள் மற்றும் காய்ச்சல் போன்ற அறிகுறிகள் உள்ளவர்கள் சமூக இடைவெளியை கடைபிடித்து, வெளியில் செல்வதை தவிர்க்க வேண்டும் என்றும், வீட்டில் ஓய்வெடுத்து, தடுப்பூசிகளை முறையாக செலுத்திக்கொள்ள வேண்டும் என பொதுசுகாதாரத்துறை வலியுறுத்தியுள்ளது.

இந்நிலையில், மாவட்ட சுகாதாரத் துறை அதிகாரிகள் நோய் பரவலை கண்காணிக்கவும், தடுப்பு நடவடிக்கைகளை மேற்கொள்ளவும் உத்தரவு வழங்கப்பட்டுள்ளது. பொதுசுகாதாரத் துறை இயக்குநர் டாக்டர் செல்வவிநாயகம் அனைத்து மாவட்ட சுகாதார அதிகாரிகளுக்கும் சுற்றறிக்கை அனுப்பியுள்ளார்.

அதில், நாடு முழுவதும் கொரோனா தொற்று பரவிவருவதை பரிசோதனைகள் உறுதி செய்துள்ளன. இதனை கருத்தில் கொண்டு, மாவட்டங்களில் நோய் தடுப்பு நடவடிக்கைகளை விரிவுபடுத்த வேண்டும். குறிப்பாக, இன்ப்ளூயன்ஸா மற்றும் சுவாசத்தொற்று குறித்த விவரங்களை தினசரி சேகரித்து, ஆய்வுகளுக்காக அனுப்ப வேண்டும். மேலும், காய்ச்சல் வார்டுகள், தேவையான எண்ணிக்கையில் படுக்கை வசதிகள் மற்றும் சிகிச்சை மூலக்கூறுகள் உள்ளதா என்பதையும் உறுதி செய்ய வேண்டும்.

அதேபோல், பொதுமக்களில் விழிப்புணர்வு ஏற்படுத்தி, கை கழுவுதல், முகக்கவசம் அணிதல், இருமும்/தும்மும்போது முகம் மூடுதல், தனிநபர் இடைவெளி கடைபிடித்தல் ஆகிய அடிப்படை சுகாதார பழக்கங்களை கடைபிடிக்க வலியுறுத்தப்பட்டுள்ளது.