சுற்றுலா பயணிகளின் பாதுகாப்பை உறுதி செய்யும் நோக்கத்தில், பழைய குற்றால அருவியில் மாலை 6 மணிக்குப் பிறகு நுழைவைத் தடுக்க வனத்துறையினர் புதிய கேட்டை அமைத்துள்ளனர்.
மேற்குத் தொடர்ச்சி மலைப்பகுதிகளில் தொடர்ந்து பெய்யும் கனமழையால், இரவு நேரங்களில் திடீர் வெள்ளப்பெருக்கு ஏற்படும் அபாயம் உள்ளது. கடந்த காலங்களில், இவ்வகை வெள்ளப்பெருக்குகளில் சுற்றுலாப் பயணிகள் சிக்கி விபத்துக்குள்ளான சம்பவங்கள் ஏற்பட்டுள்ளன.
இந்த நிலையைத் தவிர்க்கவும், சமூக விரோதச் செயல்கள் நடக்காமல் தடுப்பதற்கும், தற்போது புதிய நேரக் கட்டுப்பாடு விதிக்கப்பட்டுள்ளது. மாலை 6 மணிக்கு பிறகு பழைய குற்றால அருவிக்கு யாரும் செல்ல வேண்டாம் என வனத்துறை அதிகாரிகள் அறிவுறுத்தியுள்ளனர்.
புதிய கேட், தினமும் மாலை 6 மணிக்கு மூடப்படும். இந்த நடவடிக்கையை வனத்துறை, காவல்துறை மற்றும் தீயணைப்புத் துறை இணைந்து அமல்படுத்த உள்ளனர். சுற்றுலாப் பயணிகளுக்கு இந்த கட்டுப்பாடு குறித்த விழிப்புணர்வும் ஏற்படுத்தப்பட்டு வருகிறது.
இந்நடவடிக்கை சுற்றுலாப் பயணிகளின் பாதுகாப்பை மட்டும் அல்லாது, இயற்கை வளங்களை பாதுகாப்பதிலும் முக்கிய பங்கு வகிக்கும் என அதிகாரிகள் தெரிவித்துள்ளனர். அதற்கான வழிகாட்டுதல்களும் விரைவில் பிற அருவிகளில் அமல்படுத்தப்படும் எனத் தெரிகிறது.
Leave a Reply