திருச்செந்தூர் சுப்பிரமணிய சுவாமி கோவிலில் 16 ஆண்டுகளுக்கு பின் மகா கும்பாபிஷேகம்

​கடைசியாக 2009 ஜூலை 2ஆம் தேதி மகா குடமுழுக்கு நடைபெற்றிருந்த நிலையில், அதனைத் தொடர்ந்து இந்த வருடம் ஜூலை 7, திங்கட்கிழமை காலை 6.15 மணிக்கு, ராஜகோபுரத்தின் கும்ப கலசங்களுக்கு மகா கும்பாபிஷேகம் நடைபெற்றது. அதே நேரத்தில், கோவில் விமான தளத்தில் உள்ள மூலவர், சண்முகர், வள்ளி, தெய்வானை, பெருமாள் மற்றும் நடராஜர் கோபுர கலசங்களுக்கும் கும்பாபிஷேகம் செய்யப்பட்டது.

பின்னர் பரிவார மூர்த்திகளுக்கும் கும்பாபிஷேகம் நடத்தப்பட்டு, விழாவின் போது தமிழ் வேதங்களும் ஓதப்பட்டன. விழாவை முடிவடையவைத்த புனிதநீர்த் தெளிப்பு நிகழ்வில், 20 ட்ரோன்கள் மூலம் பக்தர்களின் மீது புனித நீர் தெளிக்கப்பட்டது என்பது குறிப்பிடத்தக்கது.

இந்த விழாவில் அமைச்சர்கள் அனிதா ராதாகிருஷ்ணன் மற்றும் சேகர்பாபு, திருவாவடுதுறை மற்றும் தருமபுரம் ஆதீனங்கள், உயர்நீதிமன்ற நீதிபதிகள், மாவட்ட ஆட்சித்தலைவர் இளம்பகவத், கோவில் தக்கார் அருள்முருகன் உள்ளிட்ட முக்கிய பிரமுகர்கள் கலந்து கொண்டனர்.

கும்பாபிஷேக நிகழ்வை காண, 6 லட்சத்திற்கும் மேற்பட்ட பக்தர்கள் திருச்செந்தூருக்கு வருகை தந்துள்ளனர். கோவிலுக்குள் பக்தர்கள் நுழைய முடியாததால், நகரம் முழுவதும் 70 பெரிய எல்இடி திரைகள் மூலம் விழா நேரலை செய்யப்பட்டது. பாதுகாப்பை உறுதி செய்ய 6000 காவல்துறையினர் நியமிக்கப்பட்டிருந்தனர்.

அமைச்சர் சேகர்பாபு, “இது போன்ற மகா விழாவில் ஏராளமான பக்தர்கள் பங்கேற்க வந்துள்ளனர். அனைவருக்கும் தேவையான வசதிகள் செய்யப்பட்டுள்ளன,” என கூறினார். திருச்செந்தூர் நகரம், பக்தி உணர்வும் மகிழ்ச்சியும் நிறைந்த திருவிழா காட்சியாய் மாறியது.