ஈரான் உச்சத் தலைவர் அலி கமேனி படுகொலை செய்யப்பட்டதாக வெளியான தகவல்களைத் தொடர்ந்து, அமெரிக்கா மற்றும் ஈரான் இடையே கடும் பதற்றம் உருவாகியுள்ளது. இந்தச் சம்பவம் மத்திய கிழக்கில் நேரடி போருக்கான அபாயத்தை அதிகரித்துள்ளதாக அரசியல் வட்டாரங்கள் கருதுகின்றன.
இதற்கிடையில், அமெரிக்க அதிபர் டொனால்ட் ட்ரம்ப் தனது சமூக வலைத்தளத்தில் கடுமையான எச்சரிக்கை வெளியிட்டுள்ளார். ஈரான் அமெரிக்கா மீது தாக்குதல் நடத்த முயன்றால், அதற்கு இதுவரை காணாத அளவிலான மிக வலுவான பதிலடி வழங்கப்படும் என அவர் தெரிவித்துள்ளார். ஈரான் தாக்குதலை தவிர்க்க வேண்டும் என்றும் அவர் வலியுறுத்தியுள்ளார்.
மறுபுறம், கமேனியின் மரணத்திற்கு பழிவாங்கப்படும் என ஈரான் நாடாளுமன்றத் தலைவர் முகமது பாகர் காலிபாஃப் கூறியுள்ளார். அமெரிக்காவும் இஸ்ரேலும் எல்லை மீறியுள்ளன; இதற்கான விளைவுகளை அவர்கள் சந்திக்க வேண்டியிருக்கும் என்றும் அவர் எச்சரித்துள்ளார்.
மேலும், அமெரிக்கா மற்றும் இஸ்ரேல் இணைந்து மேற்கொண்டதாக கூறப்படும் இராணுவ நடவடிக்கையால் ஈரானின் கடற்படை மற்றும் ஏவுகணைத் தளங்கள் சேதமடைந்துள்ளதாக தகவல்கள் வெளியாகியுள்ளன. இதனால் நிலவும் சூழ்நிலை மேலும் பதற்றமடைந்துள்ளது.
இந்நிலையில், உலக நாடுகள் இரு தரப்பினரும் அமைதியை கடைப்பிடிக்க வேண்டும் என வலியுறுத்தி வருகின்றன. இருப்பினும், பரஸ்பர எச்சரிக்கைகள் மத்திய கிழக்கில் நிலவும் பதற்றத்தை மேலும் தீவிரப்படுத்தியுள்ளன.
Leave a Reply